ക്രിക്കറ്റ് ആരാധകർക്ക് ഒടുവിൽ സന്തോഷ വാർത്ത. കോവിഡ്​ മഹാമാരി മൂലം അനന്തമായി നീണ്ട ഐ.പി.എൽ ട്വൻറി20 ക്രിക്കറ്റ്​ മാമാങ്കം (ഇന്ത്യൻ പ്രീമിയർ ലീഗ്​) സെപ്​റ്റംബറിൽ യു.എ.ഇയിൽ ആരംഭിക്കും. ​19 ന്​ ആരംഭിക്കുന്ന ഗ്ലാമർ പോരാട്ടത്തി​​ന്റെ കൊട്ടിക്കലാശം നവംബർ എട്ടിന്​ നടക്കും. ബി.സി.സി.​ഐ വൃത്തങ്ങളിൽ നിന്നുള്ള അ​നൗദ്യോഗിക സ്​ഥിരീകരണമാണ്​ പുറത്തുവന്നത്​.

അടുത്ത ആഴ്​ച കൂടുന്ന ​ ഐ.പി.എൽ ഗവേർണിങ്​ മീറ്റിങ്ങിൽ ഷെഡ്യൂളുകളും മറ്റു തീരുമാനങ്ങളും അറിയിക്കും.

ഓസ്​ട്രേലിയയിൽ നടക്കുന്ന ട്വൻറി20 ലോകകപ്പ്​ ​ക്രിക്കറ്റ് മാറ്റിവെച്ചാൽ ആ സമയത്ത്​ ​ ഐ.പി.എൽ നടത്താനാവുമെന്ന്​ നേരത്തെ ബി.സി.സി​.​ഐ സൂചന നൽകിയിരുന്നു. ലോകകപ്പ്​ മാറ്റിവെക്കാൻ ​ ഐ.സി.സി  തീരുമാനിച്ചതോടെയാണ്​ ​​ ഐ.പി.എൽ, യു.എ.ഇയിൽ നടത്താൻ തീരുമാനമാവുന്നത്​.

കോടികൾ ഒഴുകുന്ന ​ഇന്ത്യൻ പ്രീമിയർ ലീഗ്​ ഇൗ വർഷം നടന്നില്ലെങ്കിൽ ബി.സി.സി​.​ ഐക്ക്​ വൻ സാമ്പത്തിക നഷ്​ടമുണ്ടാവുമെന്നതിനാലാണ്​ എന്തു വിലകൊടുത്തും ടൂർണമെന്റെ നടത്തുന്നത്​.  ഏകദേശം 12000 കോടി രൂപ നഷ്ടമാണ് ഐ. പി.എൽ നടന്നില്ലെങ്കിൽ ബി.സി.സി.ഐ ഉണ്ടാകുക.