Tag Archive: Eden Hazard

  1. ആർക്കും വേണ്ടാതെ ഈഡൻ ഹസാർഡ്, റയൽ മാഡ്രിഡ് വിട്ട താരത്തിന് ഓഫറുകളില്ല

    Leave a Comment

    ഒരു കാലത്ത് ലോകഫുട്ബോളിലെ ഏറ്റവും മികച്ച താരങ്ങളിൽ ഒരാളായിരുന്നു ഈഡൻ ഹസാർഡ്. ചെൽസിയിൽ മിന്നുന്ന പ്രകടനം നടത്തിയിരുന്ന താരത്തെ റയൽ മാഡ്രിഡ് സ്വന്തമാക്കിയതോടെ കരിയറിൽ വലിയൊരു വളർച്ചയിലേക്കാണ് താരം പോകുന്നതെന്ന് ഏവരും കരുതി. എന്നാൽ പ്രതീക്ഷകൾക്ക് വിരുദ്ധമായി റയൽ മാഡ്രിഡിനൊപ്പം ഒരിക്കൽപ്പോലും തന്റെ പ്രതിഭ പുറത്തെടുക്കാൻ കഴിയാത്ത സാഹചര്യമാണ് ബെൽജിയൻ താരത്തിനുണ്ടായത്.

    അമിതഭാരവുമായി 2019ൽ റയൽ മാഡ്രിഡിലേക്ക് ചേക്കേറിയ ഈഡൻ ഹസാർഡിനു പരിക്കുകൾ തുടർച്ചയായി തിരിച്ചടി നൽകി. അതിനു പുറമെ ഫോം നഷ്‌ടം കൂടിയായപ്പോൾ റയൽ മാഡ്രിഡിൽ പകരക്കാരുടെ ബെഞ്ചിലായിരുന്നു താരത്തിന് സ്ഥാനം. കഴിഞ്ഞ സീസണിൽ ആകെ ആറു മത്സരങ്ങളിൽ മാത്രമാണ് താരം കളിക്കാനിറങ്ങിയിട്ടുള്ളത്. സീസൺ അവസാനിച്ചതോടെ ഹസാർഡ് റയൽ വിടുകയും ചെയ്‌തു.

    ഒരു വർഷം കരാർ ബാക്കി നിൽക്കെയാണ് ഈഡൻ ഹസാർഡ് റയൽ മാഡ്രിഡ് വിട്ടത്. താരത്തിന് നൽകിയിരുന്ന വമ്പൻ പ്രതിഫലത്തിൽ നിന്നും അതോടെ റയൽ മാഡ്രിഡിന് മോചനമായി. അതേസമയം റയൽ മാഡ്രിഡ് വിട്ട ഈഡൻ ഹസാർഡിന്റെ ഭാവി എന്താകുമെന്ന് ഇതുവരെയും തീരുമാനമായിട്ടില്ല. മുപ്പത്തിരണ്ടു വയസുള്ള താരത്തിനായി ഇതുവരെ ഒരു ക്ലബും രംഗത്തു വന്നിട്ടില്ലെന്നാണ് റിപ്പോർട്ടുകൾ സൂചിപ്പിക്കുന്നത്.

    സൗദി അറേബ്യൻ ക്ലബുകളുമായും ലയണൽ മെസി ചേക്കേറിയ ഇന്റർ മിയാമിയുമായെല്ലാം ചേർത്ത് അഭ്യൂഹങ്ങൾ ഉണ്ടായിരുന്നെങ്കിലും ഹസാർഡ് ഇപ്പോഴും ഫ്രീ ഏജന്റായി തുടരുകയാണ്. റയൽ മാഡ്രിഡിൽ നാല് സീസണിൽ 76 മത്സരങ്ങൾ മാത്രം കളിച്ച താരം ഏഴു ഗോളുകൾ മാത്രമാണ് നേടിയിട്ടുള്ളത്. അതുകൊണ്ടു തന്നെ യൂറോപ്പിലെ വമ്പൻ ക്ലബുകളൊന്നും താരത്തെ പരിഗണിക്കാനുള്ള സാധ്യതയില്ല.

  2. കയ്യിലിരുന്നത് കോടികൾ, സൂപ്പർതാരത്തെ ഒഴിവാക്കിയത് ബുദ്ധിപരമായ നീക്കം

    Leave a Comment

    ചെൽസിയിൽ നിന്നും വലിയ പ്രതീക്ഷകളോടെയാണ് ബെൽജിയൻ സൂപ്പർതാരം ഈഡൻ ഹസാർഡ് റയൽ മാഡ്രിഡിലേക്ക് 2019ൽ ചേക്കേറിയത്. അക്കാലത്ത് ലോകത്തിലെ തന്നെ ഏറ്റവും മികച്ച കളിക്കാരിൽ ഒരാളായിരുന്ന ഹസാർഡിന്റെ വരവ് റയൽ മാഡ്രിഡ് ആരാധകർ ആഘോഷപൂർവം ഏറ്റെടുത്ത ഒന്നായിരുന്നു. എന്നാൽ അവരുടെ പ്രതീക്ഷകളെല്ലാം തെറ്റുന്നതാണ് അതിനു ശേഷം കണ്ടത്.

    അമിതഭാരവുമായി റയൽ മാഡ്രിഡിലേക്ക് വന്ന ഈഡൻ ഹസാർഡിനു പിന്നീടൊരിക്കലും തന്റെ മികവ് കാണിക്കാൻ കഴിഞ്ഞില്ല. താരം മെച്ചപ്പെടുമെന്ന് ഓരോ സീസണിലും ആരാധകർ പ്രതീക്ഷിച്ചെങ്കിലും നാല് സീസൺ കഴിഞ്ഞിട്ടും അതുണ്ടായില്ല. ടീമിൽ പകരക്കാരുടെ നിരയിലേക്ക് ബെൽജിയൻ താരം പിന്തള്ളപ്പെട്ടു. കഴിഞ്ഞ ദിവസം താരം ക്ലബ് വിടുകയാണെന്ന് റയൽ മാഡ്രിഡ് ഔദ്യോഗികമായി പ്രഖ്യാപിക്കുകയും ചെയ്‌തു.

    ഒരു സീസൺ കൂടി കരാർ ബാക്കി നിൽക്കെയാണ് ഈഡൻ ഹസാർഡിനെ റയൽ മാഡ്രിഡ് ഒഴിവാക്കുന്നത്. ക്ലബിനൊപ്പം തുടരാൻ തീരുമാനിച്ച താരത്തെ ഒഴിവാക്കുന്നതിലൂടെ വലിയ തുകയാണ് റയൽ മാഡ്രിഡ് ലാഭിച്ചിരിക്കുന്നത്. റയൽ മാഡ്രിഡിൽ ഏറ്റവുമധികം പ്രതിഫലം വാങ്ങുന്ന താരങ്ങളിൽ ഒരാളായ ഹസാർഡ് അതിൽ ഒരു ഭാഗം ത്യജിച്ച് ക്ലബ് വിടുന്നതിലൂടെ ഏഴു മില്യൺ യൂറോ (61 കോടി രൂപയോളം) റയൽ മാഡ്രിഡ് ലാഭിച്ചുവെന്ന് ഫാബ്രിസിയോ റൊമാനൊ വെളിപ്പെടുത്തുന്നു.

    റയൽ മാഡ്രിഡിന് വേണ്ടി സ്ഥിരമായി കളിക്കാനും മികച്ച പ്രകടനം നടത്താനും കഴിഞ്ഞില്ലെങ്കിലും തന്റെ കരിയറിന് പൂർണത നൽകിയാണ് ഹസാർഡ് ക്ലബ് വിടുന്നത്. നാല് വർഷത്തെ കരിയറിൽ ചാമ്പ്യൻസ് ലീഗ്, ക്ലബ് ലോകകപ്പ്, രണ്ടു ലീഗ്, യൂറോപ്യൻ സൂപ്പർ കപ്പ്, കോപ്പ ഡെൽ റേ, സ്‌പാനിഷ്‌ സൂപ്പർ കപ്പ് എന്നീ നേട്ടങ്ങൾ ഹസാർഡ് സ്വന്തമാക്കി. താരം ഏത് ക്ലബ്ബിലേക്ക് ചേക്കേറുമെന്ന കാര്യത്തിൽ വ്യക്തത വന്നിട്ടില്ല.

  3. പ്രതിഫലം കൈവിടാൻ ഒരുക്കമല്ല, റയൽ മാഡ്രിഡിൽ തന്നെ തുടരുമെന്ന് ഈഡൻ ഹസാർഡ്

    Leave a Comment

    പ്രീമിയർ ലീഗിൽ മിന്നിത്തിളങ്ങി നിൽക്കുന്ന സമയത്താണ് ഈഡൻ ഹസാർഡ് റയൽ മാഡ്രിഡിലേക്ക് ചേക്കേറുന്നത്. ഫ്രീ ഏജന്റാവാൻ ഒരു വർഷം മാത്രം ബാക്കിയുണ്ടായിരുന്ന താരത്തെ നൂറു മില്യൺ യൂറോയിലധികം നൽകിയാണ് ചെൽസിയിൽ നിന്നും റയൽ മാഡ്രിഡ് സ്വന്തം തട്ടകത്തിലെത്തിച്ചത്. എന്നാൽ ആ ട്രാൻസ്‌ഫറിൽ റയൽ മാഡ്രിഡ് പിന്നീട് പശ്ചാത്തപിച്ചിരിക്കും എന്നുറപ്പാണ്.

    റയൽ മാഡ്രിഡിലെത്തി നാല് വർഷങ്ങൾ കഴിഞ്ഞെങ്കിലും ഇതുവരെ ക്ലബിന് വേണ്ടി തന്റെ കഴിവിന്റെ ഒരംശം പോലും നൽകാൻ ബെൽജിയൻ താരത്തിന് കഴിഞ്ഞിട്ടില്ല. ഈ സീസണിൽ ആകെ ഒരു ലീഗ് മത്സരത്തിൽ മാത്രമാണ് താരം ആദ്യ ഇലവനിൽ ഇറങ്ങിയിരിക്കുന്നത്. അവസരങ്ങൾ ഇല്ലാത്ത, ടീമിന്റെ പദ്ധതികളിൽ പ്രധാനിയില്ലാത്ത താരത്തെ വിൽക്കാൻ റയൽ മാഡ്രിഡിന് ആഗ്രഹമുണ്ടെങ്കിലും അത് നടക്കില്ലെന്നാണ് വ്യക്തമാകുന്നത്.

    “റയൽ മാഡ്രിഡിൽ അടുത്ത സീസണിലും തുടരാനാണ് ഞാൻ തീരുമാനിച്ചിരിക്കുന്നത്. ഇവിടെ തുടർന്ന് അവസാന സീസൺ ആസ്വദിക്കാനാണ് എന്റെ തീരുമാനം. ഇതൊരു ബുദ്ധിമുട്ടുള്ള സീസൺ ആയിരുന്നെങ്കിലും ഒരു വലിയ ക്ലബിനൊപ്പമായിരുന്നു അത്. ക്ലബുമായും കളിക്കാരുമായും മികച്ച ബന്ധമാണ് എനിക്കുള്ളത്. കളിക്കാൻ ആഗ്രഹമുണ്ടെങ്കിലും അതിനു സാധ്യത കുറവാണ്, എന്നാൽ പ്രയത്നിച്ച് അവസരങ്ങൾ നേടിയെടുക്കും.” ഹസാർഡ് കഴിഞ്ഞ ദിവസം പറഞ്ഞു.

    ഒരു സീസൺ മാത്രം കരാറിൽ ബാക്കിയുള്ള ഹസാർഡിനെ വിൽക്കാൻ റയൽ മാഡ്രിഡിനുള്ള അവസാനത്തെ അവസരമാണ് ഈ സമ്മർ ട്രാൻസ്‌ഫർ ജാലകം. ഇത്രയും തുക പ്രതിഫലം വാങ്ങുന്ന താരത്തെ ഒഴിവാക്കിയില്ലെങ്കിൽ അത് ടീമിലേക്ക് മറ്റു താരങ്ങളെ കൊണ്ടു വരുന്നതിനുള്ള റയൽ മാഡ്രിഡിന്റെ പദ്ധതികളെ ബാധിക്കും. തന്റെ വമ്പൻ പ്രതിഫലം ഒഴിവാക്കി റയൽ മാഡ്രിഡ് വിടാൻ ഹസാർഡും തയ്യാറാവില്ല.

     

     

  4. റയൽ മാഡ്രിഡിന്റെ രണ്ടു താരങ്ങൾ റൊണാൾഡോക്കൊപ്പം അൽ നസ്‌റിലെത്താൻ സാധ്യത

    Leave a Comment

    എത്ര പ്രധാനപ്പെട്ട താരങ്ങളാണെങ്കിലും റയൽ മാഡ്രിഡ് വിടണമെന്ന ആഗ്രഹം പ്രകടിപ്പിച്ചാൽ അവരെ നിർബന്ധിച്ച് ടീമിനൊപ്പം നിലനിർത്താൻ പ്രസിഡന്റായ ഫ്ലോറൻറീനോ പെരസ് തയ്യാറാകാറില്ല. ക്ലബിനായി ഏറ്റവും മികച്ച ഫോമിൽ കളിച്ചു കൊണ്ടിരിക്കുന്ന സമയത്ത് ക്രിസ്റ്റ്യാനോ റൊണാൾഡോ, കസമീറോ എന്നിവരെ വിട്ടുകൊടുത്തത് അതിനൊരു ഉദാഹരണമാണ്. ഈ താരങ്ങളെ വിരമിക്കുന്നത് വരെയും ടീമിൽ നിലനിർത്താൻ കഴിയുമായിരുന്നിട്ടും ഫ്ലോറന്റീനോ പെരസ് അതിനു വേണ്ടിയുള്ള ശ്രമങ്ങൾ നടത്തിയില്ല.

    റയൽ മാഡ്രിഡിനെ മൊത്തത്തിൽ അഴിച്ചു പണിതു കൊണ്ടിരിക്കുകയാണ് പെരസിപ്പോൾ. മോഡ്രിച്ച്, ക്രൂസ്, ബെൻസിമ തുടങ്ങിയവർ കരിയറിന്റെ അവസാനഘട്ടത്തിലാണ് ഇതിനു പുറമെ ഹസാർഡ് അടക്കമുള്ള താരങ്ങളെ ക്ലബിൽ നിന്നും ഒഴിവാക്കേണ്ടതും അതിനു പകരം മികച്ച യുവതാരങ്ങളെ എത്തിക്കേണ്ടതും അനിവാര്യമാണ്. ഇതിനു വേണ്ടിയുള്ള പ്രവർത്തനങ്ങൾ പടിപടിയായി റയൽ നടത്തുന്നുണ്ട്. വിനീഷ്യസ്, റോഡ്രിഗോ, കാമവിങ, ഷുവാമേനി എന്നിവരെല്ലാം ടീമിലെത്തുന്നത് ഇതിന്റെ ഭാഗമായാണ്.

    ഈ സീസണു ശേഷം റയൽ മാഡ്രിഡ് വിടുമെന്നുറപ്പുള്ള ഒരു താരം ഈഡൻ ഹസാർഡാണ്‌. ചെൽസിയിൽ മിന്നും ഫോമിൽ കളിക്കുന്ന സമയത്ത് റയൽ മാഡ്രിഡിലേക്ക് ചേക്കേറിയ താരത്തിന് ഇതുവരെയും തന്റെ മികച്ച ഫോം പുറത്തെടുക്കാൻ കഴിഞ്ഞിട്ടില്ല. ഇനിയൊരു തിരിച്ചു വരവുണ്ടാകാൻ സാധ്യതയില്ലെന്നുറപ്പായ ഈഡൻ ഹസാർഡ് റൊണാൾഡോയുടെ ക്ലബായ അൽ നസ്റിലേക്ക് ചേക്കേറാനുള്ള സാധ്യതയുണ്ടെന്നാണു സ്പോർട്ടിന്റെ റിപ്പോർട്ടുകൾ സൂചിപ്പിക്കുന്നത്.

    ഹസാർഡിനു പുറമെ മോഡ്രിച്ചും അൽ നസ്‌റിലെത്താൻ സാധ്യതയുണ്ടെന്ന് റിപ്പോർട്ടുകൾ വ്യക്തമാക്കുന്നു. ഈ സീസണിൽ റയൽ മാഡ്രിഡിനായി ഏറ്റവും മികച്ച പ്രകടനമല്ല മോഡ്രിച്ച് നടത്തുന്നത്. പ്രായം താരത്തെയും ബാധിച്ചുവെന്നതിനാൽ റയൽ മാഡ്രിഡ് കരാർ പുതുക്കാതിരിക്കാൻ സാധ്യതയുണ്ട്. അങ്ങിനെയാണെങ്കിൽ റൊണാൾഡോക്കൊപ്പം താരവും അൽ നസ്റിൽ എത്തുമെന്നാണ് റിപ്പോർട്ടുകൾ പറയുന്നത്. എന്നാൽ റയൽ മാഡ്രിഡിനെ വളരെയധികം സ്നേഹിക്കുന്ന മോഡ്രിച്ച് കരാർ പുതുക്കിയില്ലെങ്കിൽ വിരമിക്കാനുള്ള സാധ്യതയും തള്ളിക്കളയാൻ കഴിയില്ല.

    ലോകകപ്പിൽ ക്രൊയേഷ്യയോടൊപ്പം മികച്ച പ്രകടനമാണ് മോഡ്രിച്ച് നടത്തിയത്. അതുകൊണ്ടു തന്നെ ഇനിയും കളിക്കളത്തിൽ തുടരാൻ താരത്തിന് കഴിയുമെന്ന കാര്യത്തിൽ യാതൊരു സംശയവുമില്ല. ഈ രണ്ടു താരങ്ങളും റയൽ മാഡ്രിഡിൽ മികച്ച പ്രതിഫലം വാങ്ങുന്ന താരങ്ങളുമാണ്. നിലവിലെ സാഹചര്യത്തിൽ ഉയർന്ന തുക ലഭിക്കാൻ ഇവർക്ക് സൗദി തന്നെയാണ് തിരഞ്ഞെടുക്കാൻ കഴിയുക.

  5. “കളിച്ചു ജയിക്കാൻ നോക്കാതെ രാഷ്ട്രീയം പറഞ്ഞാൽ ഇങ്ങനിരിക്കും”- ജർമനിക്കെതിരെ ഈഡൻ ഹസാർഡ്

    Leave a Comment

    ഖത്തർ ലോകകപ്പിൽ സൗത്ത് കൊറിയക്കെതിരെ നടന്ന മത്സരത്തിൽ തോൽവി വഴങ്ങിയ ജർമനി അതിനു മുന്നോടിയായി നടത്തിയ പ്രതിഷേധം ശ്രദ്ധിക്കപ്പെട്ട ഒന്നായിരുന്നു. മത്സരത്തിനു മുൻപ് ടീം ഫോട്ടോയെടുക്കുമ്പോൾ എല്ലാ ജർമൻ താരങ്ങളും മുഖം പൊത്തിപ്പിടിച്ചാണ് പോസ് ചെയ്‌തത്‌. തങ്ങളുടെ രാഷ്ട്രീയവും ഖത്തറിന്റെ നിലപാടുകൾക്കെതിരായ പ്രതിഷേധവും പറയുന്നതിനെ ഫിഫ വിലക്കിന്റെ ഭീഷണിയുയർത്തി തടഞ്ഞതിന്റെ ഭാഗമായാണ് ജർമൻ ടീം ഇത്തരമൊരു പ്രതിഷേധം മത്സരത്തിനു മുൻപ് നടത്തിയത്.

    എൽജിബിടിക്യൂ കമ്മ്യൂണിറ്റിക്കെതിരെ ഖത്തറിൽ നിലനിൽക്കുന്ന നിയമങ്ങളിൽ പ്രതിഷേധം ഉയർത്തുകയെന്ന ലക്‌ഷ്യം ജർമനിക്ക് ഉണ്ടായിരുന്നു. ഇതിനായി വൺ ലവ് ആംബാൻഡ്‌ മത്സരത്തിൽ അണിയാനും അവർ തീരുമാനിച്ചു. എന്നാൽ ആംബാൻഡ്‌ അണിയാനുള്ള തീരുമാനത്തിൽ നിന്നും ഫിഫ അവരെ തടയുകയായിരുന്നു. ആംബാൻഡ്‌ അണിഞ്ഞു കളിച്ചാൽ മത്സരത്തിന്റെ തുടക്കത്തിൽ തന്നെ മഞ്ഞക്കാർഡ് സ്വീകരിക്കേണ്ടി വരുമെന്നാണ് ഫിഫ പറഞ്ഞത്. ഇതേത്തുടർന്ന് ആംബാൻഡ്‌ ധരിക്കാനുള്ള തീരുമാനത്തിൽ നിന്നും പിൻമാറിയ ജർമൻ ടീം ഫിഫക്കെതിരെയുള്ള പ്രതിഷേധമെന്ന നിലയിലാണ് വായ് മൂടി ഫോട്ടോക്ക് പോസ് ചെയ്‌തത്‌.

    അതേസമയം ജർമനിയുടെ പ്രതിഷേധത്തിൽ ബെൽജിയം നായകനും റയൽ മാഡ്രിഡ് താരവുമായ ഈഡൻ ഹസാർഡിന് അനുകൂല നിലപാടല്ലെന്ന് താരത്തിന്റെ വാക്കുകൾ വ്യക്തമാക്കുന്നു. മത്സരത്തിൽ ജർമനി തോൽവി വഴങ്ങിയ കാര്യം ചൂണ്ടിക്കാട്ടിയ ഈഡൻ ഹസാർഡ് ജർമൻ ടീം രാഷ്ട്രീയം പറയുന്നതിൽ ശ്രദ്ധ കേന്ദ്രീകരിക്കാതെ വിജയിക്കാനാണ് നോക്കേണ്ടിയിരുന്നതെന്ന് പറഞ്ഞു. ലോകകപ്പിൽ ഓരോ ടീമും വന്നിരിക്കുന്നത് കളിക്കാൻ വേണ്ടിയാണെന്നും രാഷ്ട്രീയം പറയാൻ വേറെ ആളുകളുണ്ടെന്നും ഫുട്ബോളിലാണ് ഓരോ ടീമും ശ്രദ്ധ കേന്ദ്രീകരിക്കേണ്ടതെന്നും ഹസാർഡ് കൂട്ടിച്ചേർത്തു.

    സ്വവർഗരതി ഖത്തറിൽ നിയമപരമല്ലാത്ത ഒന്നാണ്. അത് മനസിന്റെ വൈകല്യമായാണ് ഖത്തറിൽ കണക്കാക്കപ്പെടുന്നത്. ഇതടക്കം നിരവധി വിഷയങ്ങളിൽ പാശ്ചാത്യ രാജ്യങ്ങൾ ഖത്തറിനെതിരെ പ്രതിഷേധം ഉയർത്തിയിരുന്നു. പല രാജ്യങ്ങളും ഇതിനെതിരെ ലോകകപ്പ് വേദിയിൽ പ്രതിഷേധിക്കാൻ തീരുമാനിച്ചിരുന്നെങ്കിലും ഒരു രാജ്യത്തിന്റെ നിയമങ്ങളെ മുറിവേൽപ്പിക്കുന്ന തരത്തിലുള്ള ഇത്തരം കാര്യങ്ങൾ അനുവദിക്കാൻ കഴിയില്ലെന്നു പറഞ്ഞ് ഫിഫ അതിനെ മുളയിലേ തന്നെ നുള്ളിക്കളയുകയായിരുന്നു.

  6. തോൽവിയിലും ചെൽസി താരങ്ങളുമായി ചിരിച്ചുല്ലസിച്ച് ഹസാർഡ്, വൻ വിമർശനങ്ങളുമായി മാഡ്രിഡ്‌ ആരാധകർ

    Leave a Comment

    ചെൽസിയോട് ചാമ്പ്യൻസ്‌ലീഗ് സെമി ഫൈനൽ രണ്ടാം പാദത്തിൽ എതിരില്ലാത്ത രണ്ടു ഗോളുകൾക്ക് തോൽവിയേറ്റു വാങ്ങിയതോടെ 14ആം ചാമ്പ്യൻസ്‌ലീഗ് കിരീടമെന്ന റയലിന്റെ സ്വപ്നം തകർന്നടിഞ്ഞിരിക്കുകയാണ്. ചെൽസിയോട് തോൽവിയേറ്റു വാങ്ങേണ്ടി വന്നുവെങ്കിലും അതിന്റെ യാതൊരു വിഷമവുമില്ലാതെ ചെൽസി താരങ്ങളുമായി ചിരിച്ചു സംസാരിക്കുന്ന ഈഡൻ ഹാസാർഡിന്റെ ചിത്രങ്ങളാണ് ഇപ്പോൾ സമൂഹമാധ്യമങ്ങളിൽ ചർച്ചാ വിഷയം.

    റയൽ മാഡ്രിഡിന്റെ ബാക്കിയെല്ലാ താരങ്ങളും തോറ്റതിന്റെ നിരാശയിൽ കളത്തിൽ നിൽകുമ്പോൾ ചെൽസി താരങ്ങളായ കർട്ട് സൂമയോടും ഗോൾകീപ്പർ മെൻഡിയോടും സംസാരിച്ചു ചിരിക്കുന്ന ഹസാർഡിനെയാണ് കാണാൻ സാധിക്കുന്നത്. ഇതിന്റെ വീഡിയോയും ചിത്രങ്ങളുമാണ് നിലവിൽ സമൂഹമാധ്യമങ്ങളിൽ വൈറലായിരിക്കുന്നത്.

    മാഡ്രിഡ്‌ ആരാധകർ സോഷ്യൽ മീഡിയയിലൂടെ വൻ വിമർശനങ്ങളാണ് ഹസാർഡിനെതിരെ ഉന്നയിച്ചു കൊണ്ടിരിക്കുന്നത്. ഈ രോഷം ഏതാനും ക്ലബ്ബ് മെമ്പർമാരുടെ ഇടയിലും ഉയർന്നിട്ടിട്ടുണ്ടെന്നാണ് പ്രമുഖ മാധ്യമമായ ഈഎസ്പിഎൻ റിപ്പോർട്ട്‌ ചെയ്യുന്നത്. മത്സരത്തിലെ മോശം പ്രകടനത്തിനും താരത്തിനെതിരെ വിമർശനങ്ങൾ ഉയർന്നിട്ടുണ്ട്.

    നിരന്തരമായ പരിക്കുകൾ മൂലം പുറത്തിരിക്കേണ്ടി വന്ന ഹസാർഡ് അടുത്തിടെയാണ് മത്സരങ്ങളിലേക്ക് തിരിച്ചു വന്നത്. എന്നാൽ പരിശീലകൻ സിദാൻ താരത്തിൽ ആത്മവിശ്വാസം പ്രകടിപ്പിക്കുകയായിരുന്നു. എന്നാൽ താരത്തിൽ നിന്നുണ്ടായ ബഹുമാനമില്ലാത്ത ഈ പ്രവൃത്തി ആരാധകരെ മാത്രമല്ല ക്ലബിനെയും ചൊടിപ്പിച്ചിട്ടുണ്ടെന്നാണ് റിപ്പോർട്ടുകൾ.

  7. ചെൽസിക്കെതിരെ മറ്റൊരു ഹസാർഡിനെ കാണാം, ആരോഗ്യവനായി തിരിച്ചെത്തിയെന്ന് സിദാൻ

    Leave a Comment

    റയൽ മാഡ്രിഡിലേക്ക് ചേക്കേറിയതിനു ശേഷം ആദ്യമായി തൻ്റെ പഴയ ടീമായ ചെൽസിയെ നേരിടാനൊരുങ്ങുകയാണ് സൂപ്പർ താരമായ ഈഡൻ ഹസാർഡ്. നിരന്തരമായ പരിക്കുകൾ മൂലം വളരെക്കാലമായി തൻ്റെ പഴയ ഫോമിലേക്ക് തിരിച്ചെത്താൻ ഹസാർഡിനു ഇതുവരെ സാധിച്ചിട്ടില്ലെന്നതാണ് വസ്തുത. എന്നാൽ ഇത്തവണ ചാമ്പ്യൻസ് ലീഗിൽ ചെൽസിക്കെതിരെ മികച്ച പ്രകടനം നടത്താൻ ഹസാർ ഡിനു സാധിക്കുമെന്നാണ് സിദാൻ വ്യക്തമാക്കുന്നത്.

    ഹസാർഡ് ശരീരികമായി മികച്ച രീതിയിലാണുള്ളതെന്നാണ് സിദാൻ്റെ പക്ഷം. പരിക്കിനു ശേഷം തിരിച്ചെത്തിയ താരം റയൽ ബെറ്റിസിനെതിരെ ഭേദപ്പെട്ട പ്രകടനം കാഴ്ചവെക്കുകയും ചെയ്തിരുന്നു. ഈ സീസണിൽ ആകെ പതിനഞ്ചു മത്സരങ്ങളിൽ മാത്രമാണ് സിദാൻ അവസരം നൽകിയതെങ്കിലും ഇപ്പോഴാണ് ഹസാർഡ് മുഴുവനായും മികച്ച ആരോഗ്യത്തോടെ കളിക്കാൻ ഹസാർഡിനു സാധിക്കുന്നതെന്നാണ് സിദാൻ കണക്കുകൂട്ടുന്നത്.

    മത്സരത്തിനു മുന്നോടിയായി നടന്ന അഭിമുഖത്തിൽ സംസാരിക്കുകയായിരുന്നു സിദാൻ.
    ” ഈഡനു ഇനിയും ഒരു സംശയത്തിനു ഇടമുണ്ടെന്നു എനിക്കു തോന്നുന്നില്ല. കഴിഞ്ഞ ദിവസം അവൻ മികച്ച രീതിയിൽ കളിക്കളത്തിൽ കാണാൻ സാധിച്ചു. ”

    അതാണ് ഏറ്റവും പ്രധാനപ്പെട്ട കാര്യം. പഴയ പ്രശ്നങ്ങൾ ഒന്നും അവനു അനുഭവപ്പെടുന്നില്ല. ഇപ്പോൾ അവൻ മികച്ച രീതിയിലാണുള്ളത്. ഇനി മുന്നോട്ടു നീങ്ങേണ്ടതുണ്ട്. അവനെ ലഭിച്ചതിൽ ഞങ്ങൾ വളരെയധികം സന്തോഷവാൻമാരാണ്. ടീമിനു ഇതിലും കൂടുതൽ നൽകാൻ അവനു സാധിക്കും.” സിദാൻ പറഞ്ഞു.

  8. ഇതിനൊരു അവസാനമില്ലേ?, ഹാസാർഡിന്റെ പുതിയ പരിക്കിനെക്കുറിച്ച് വിശദീകരിക്കാനാവുന്നില്ലെന്നു സിദാൻ

    Leave a Comment

    ക്രിസ്ത്യാനോ റയൽ മാഡ്രിഡ്‌ വിട്ടതിനു ശേഷം പെരെസ് ചെൽസിയിൽ നിന്നും സ്വന്തമാക്കിയ സൂപ്പർതാരമാണ് ഈഡൻ ഹസാർഡ്. എന്നാൽ 2019ൽ റയലിലേക്ക് ചേക്കേറിയ ശേഷം ആകെ 25 മത്സരങ്ങൾ മാത്രമാണ് ഈ ബെൽജിയൻ സൂപ്പർതാരത്തിന് റയൽ മാഡ്രിഡ്‌ ജേഴ്സിയിൽ കളിക്കാനായത്. നിരന്തരമായ പരിക്കുകൾ മൂലം സീസണുകളിലെ സിംഹഭാഗം മത്സരങ്ങളും താരത്തിനു നഷ്ടമാവുകയായിരുന്നു.

    നിലവിൽ അറ്റലാന്റക്കെതിരായ രണ്ടാം പാദത്തിൽ താരം തിരിച്ചു വരുമെന്നു അഭ്യൂഹങ്ങളുണ്ടായിരുന്നുവെങ്കിലും പുതിയ പരിക്ക് താരത്തിന്റെ ഈ മുഴുവൻ സീസണെ തന്നെ ബാധിക്കുമെന്നാണ് റിപ്പോർട്ടുകൾ സൂചിപ്പിക്കുന്നത്. എൽച്ചെക്കെതിരായ ലാലിഗ മത്സരത്തിന്റെ അവസാന പതിനഞ്ചു മിനുട്ടിൽ താരം ഇറങ്ങിയെങ്കിലും വീണ്ടും കണങ്കാലിന് വേദന കൂടിയതായാണ് വിവരം.

    ഹസർഡിന് വീണ്ടും പരിക്കേറ്റതോടെ കൂടുതൽ നിരാശനായാണ് സിദാൻ കാണപ്പെട്ടത്. അത് മത്സരശേഷം സിദാൻ വെളിപ്പെടുത്തുകയും ചെയ്തു.”പുതിയതായി എന്തോ സംഭവിച്ചിട്ടുണ്ട്. കാരണം സീസൺ മുഴുവനും അവനു ഇതുവരെയും റയലിൽ ചേരുന്നതിനു മുൻപ് പുറത്തിരിക്കേണ്ടി വന്നിട്ടില്ല. വളരെ കുറച്ചു പരിക്കുകൾ മാത്രമേ പറ്റിയിട്ടുള്ളു. ഞങ്ങൾക്ക് അവനെ സഹായിക്കേണ്ടതുണ്ട്. വളരെ പെട്ടെന്നു തന്നെ തിരിച്ചു വരാൻ സാധിക്കുമെന്ന് പ്രതീക്ഷിക്കുന്നു.”

    “ഇതെല്ലാം എനിക്കു വിശദീകരിക്കാൻ പറ്റാത്ത കാര്യങ്ങളാണ്. ഞാൻ പോസിറ്റീവ് ആയിതന്നെ ഇരിക്കേണ്ടതുണ്ട്. കൂടുതൽ പ്രശ്നങ്ങളുണ്ടാവില്ല എന്നാണ് പ്രതീക്ഷിക്കുന്നത്. ഇപ്പോൾ ഇങ്ങനെ സംഭവിക്കുന്നതെന്തുകൊണ്ടാണെന്നു ഞങ്ങൾക്ക് കണ്ടെത്തേണ്ടതുണ്ട്. പക്ഷെ ഇപ്പോൾ ഇതിനെക്കുറിച്ചൊന്നും വിശദീകരിക്കാനാവില്ല. ” സിദാൻ പറഞ്ഞു.

  9. റയൽ മാഡ്രിഡിലെത്തിയപ്പോൾ ഹസാർഡിന് വയസായ പോലെ തോന്നി, ഇപ്പോഴത്തെ അവസ്ഥ വിഷമിപ്പിക്കുന്നുവെന്നു മുൻ ചെൽസി താരം

    Leave a Comment

    റയൽ മാഡ്രിഡിൽ പരിക്കു മൂലം ബുദ്ദിമുട്ടനുഭവിക്കുന്ന സൂപ്പർതാരമാണ് ഈഡൻ ഹസാർഡ്. 2019ൽ ചെൽസിയിൽ നിന്നും റയൽ മാഡ്രിഡിലേക്ക് ചേക്കേറിയ ശേഷം നിരന്തരമായ പരിക്കുകൾ താരത്തെ ഏകദേശം ഒരു സീസൺ തന്നെ പുറത്തിരിക്കേണ്ടി വന്നിരുന്നു. 2018ൽ ക്രിസ്ത്യാനോ റൊണാൾഡോ ഇറ്റലിയിലേക്ക് ചേക്കേറിയതിനു പിന്നാലെ ഹസാർഡിനെ റയൽ മാഡ്രിഡ്‌ നോട്ടമിട്ടിരുന്നുവെങ്കിലും ഒരു സീസൺ കൂടി ചെൽസിയിൽ തന്നെ താരം തുടരുകയായിരുന്നു.

    എന്നാൽ 2018ൽ തന്നെ ഹസാർഡിനെ റയൽ മാഡ്രിഡ്‌ സ്വന്തമാക്കേണ്ടതായിരുന്നുവെന്നാണ് മുൻ റയൽ സരഗോസ/ചെൽസി മിഡ്‌ഫീൽഡരായിരുന്ന ഗസ് പോയെറ്റിന്റെ അഭിപ്രായം. നിലവിലെ താരത്തിന്റെ അവസ്ഥയിൽ വളരെയധികം വിഷമമുണ്ടെന്നും അദ്ദേഹം വെളിപ്പെടുത്തി. സ്പാനിഷ് മാധ്യമമായ മാർക്കക്കു നൽകിയ അഭിമുഖത്തിൽ സംസാരിക്കുകയിരുന്നു അദ്ദേഹം.

    “ഇതെന്നെ ഒരുപാട് വിഷമിപ്പിക്കുന്നുണ്ട്. ക്രിസ്ത്യാനോ പോയ സമയമായിരുന്നു ഇവനെ പകരക്കാരനായി കൊണ്ടുവരേണ്ടിയിരുന്നത്. ആ സീസൺ ചെൽസിയിലെ അവന്റെ മികച്ച സീസൺ ആയിരുന്നു. എന്നാൽ അതിനു ശേഷം റയലിലേക്ക് വന്നപ്പോൾ അവനു പെട്ടെന്നു വയസായതു പോലെ തോന്നി. കളിശൈലിയോ മനോഭാവമോ ആണ് താരത്തിന്റെ പ്രശ്നമെന്നു എനിക്ക് തോന്നുന്നില്ല. ശാരീരികമായ പ്രശ്നങ്ങളാണെന്നെ ഞാൻ പറയുള്ളൂ.

    “ശാരീരികമായ പ്രശ്നങ്ങൾക്കാണ് അവനു വലിയ വിലകൊടുക്കേണ്ടി വന്നത്. അതാണ് അവന്റെ തിരിച്ചു വരവിനു തടസ്സമായി നിൽക്കുന്നത്. ഇതു വരെയും അവന്റെ മികവിലേക്ക് തിരിച്ചെത്താൻ സാധിച്ചിട്ടില്ല. ഒരു പരിശീലകന് കിട്ടുന്ന ഏറ്റവും മികച്ച സാഹചര്യമെന്നത് അവരുടെ താരങ്ങൾക്ക് അധികം പ്രശ്നങ്ങളില്ലാതെ കളിക്കാനാവുകയെന്നതാണ്. ഹാസർഡ് അങ്ങനെയായിരുന്നുവെന്നു തോന്നുന്നില്ല. അവൻ അവന്റെ വെറും 60% മാത്രമേ റയലിൽ മികവ് കാണിച്ചിട്ടുള്ളു. അത് സിദാന്റെ പ്രശ്നമാണെന്ന് തോന്നുന്നില്ല. എല്ലാ വെല്ലുവിളികളിൽ നിന്നുമുള്ള തിരിച്ചു വരവിലാണ് താരമെന്നേ പറയാനാകുകയുള്ളു.” പോയെറ്റ് പറഞ്ഞു.

  10. പിറന്നാൾ സമ്മാനമായി മെസിയുടെ ഇടങ്കാൽ കിട്ടാനാണ് ആഗ്രഹമെന്നു ഹസാർഡ്

    Leave a Comment

    ഇന്നലെ തന്റെ മുപ്പതാം വയസിലേക്ക് കടന്നിരിക്കുകയാണ് റയൽ മാഡ്രിഡ്‌ സൂപ്പർതാരം ഈഡൻ ഹസാർഡ്. ജന്മദിനത്തിൽ ഹസാർഡുമായി നടത്തിയ അഭിമുഖത്തിൽ മൂന്നു താരങ്ങളുടെ സാവിശേഷതകൾ ലഭിക്കാൻ ആഗ്രഹിക്കുകയാണെങ്കിൽ അതേതൊക്കെയാണെന്നുള്ള ചോദ്യത്തിന് മറുപടി നൽകിയിരിക്കുകയാണ് ഹസാർഡ്. ബെൽജിയൻ മാധ്യമമായ ആർടിബിഎഫിന് നൽകിയ അഭിമുഖത്തിൽ സംസാരിക്കുകയായിരുന്നു ഹസാർഡ്.

    പിറന്നാൽ സമ്മാനമായി സൂപ്പർതാരം ലയണൽ മെസിയിൽ നിന്നും എന്താണ് ലഭിക്കാൻ ആഗ്രഹിക്കുന്നതെന്ന ചോദ്യത്തിന് മെസിയുടെ ഇടങ്കാലാണു ചോദിക്കുകയെന്നാണ് ഹസാർഡ് മറുപടി നൽകിയത്. സൂപ്പർ താരം ക്രിസ്ത്യനോയിൽ നിന്നും ലഭിക്കാൻ ആഗ്രഹിക്കുന്ന പിറന്നാൾ സമ്മാനവും ഹാസർഡ് വെളിപ്പെടുത്തി. ജയിക്കാനുള്ള ത്വരയാണ് ഞാൻ ആഗ്രഹിക്കുന്നതെന്നാണ് ഹസാർഡ് വെളിപ്പെടുത്തിയത്.

    ട്രോഫികൾ നേടാനുള്ള അദ്ദേഹത്തിന്റെ ആഗ്രഹവും എപ്പോഴും ഗോളുകൾ നേടാനുള്ള അടങ്ങാത്ത ആഗ്രഹവും ലഭിക്കാൻ താൻ ആഗ്രഹിക്കുന്നുവെന്നു ഹാസർഡ് കൂട്ടിച്ചേർത്തു. നിലവിലെ റയൽ മാഡ്രിഡ്‌ പരിശീലകനായ സിനദിൻ സിദാനിൽ നിന്നും എന്താണ് ആഗ്രഹിക്കുന്നതെന്ന ചോദ്യത്തിനും ഹസാർഡ് മറുപടി നൽകി. സിനദിൻ സിദാന്റെ ഉയർന്ന ഗുണത്തെയാണ് താൻ ആഗ്രഹിക്കുന്നതെന്നു ഹാസർഡ് വെളിപ്പെടുത്തി.

    തനിക്കും ആ ഉയർന്ന ഗുണമുണ്ടെങ്കിലും സിദാനു കൂടുതൽ അക്കാര്യമുണ്ടെന്നാണ് ഹാസാർഡിന്റെ പക്ഷം. 30 വളരെ പെട്ടെന്നു ഉത്തരം പറയേണ്ട ചോദ്യങ്ങൾക്കാണ് ഹസാർഡ് മറുപടി നൽകിയത്. അതിൽ വീഡിയോ അസിസ്റ്റിംഗ് റഫറിയിങ്ങിനെക്കുറിച്ചും(VAR) ചോദ്യം ഉന്നയിച്ചു. വീഡിയോ റഫറിയിങ് ഫുട്ബോളിന്റെ മനോഹാരിതയെ ഇല്ലാതാക്കുന്നുവെന്നും ഗോളടിച്ചതിനു ശേഷം എന്ത് സംഭവിക്കുന്നുവെന്നു കാത്തിരിക്കേണ്ടി വരുന്നുവെന്നും ഹസാർഡ് ചൂണ്ടിക്കാണിച്ചു. തെറ്റുകൾ തിരുത്തുന്നുണ്ടെങ്കിലും ഫുട്ബോളിന്റെ മനോഹരിതയെ ഇല്ലാതാക്കുന്ന വീഡിയോ റഫറിയിങ്ങിനു വിട എന്നാണ് ഹസാർഡ് അഭിപ്രായപ്പെട്ടത്.