ഡി മരിയയുടെ കളികൾ ഇനി ജർമനിയിൽ, താരത്തിനായി അന്വേഷണം നടത്തി വമ്പന്മാർ
Leave a Commentഈ സീസണോടെ യുവന്റസുമായുള്ള കരാർ അവസാനിക്കുന്ന ഏഞ്ചൽ ഡി മരിയ അത് പുതുക്കുമെന്നാണ് പ്രതീക്ഷിച്ചിരുന്നതെങ്കിലും ഇപ്പോൾ അതിനുള്ള സാധ്യതകൾ മങ്ങിയിട്ടുണ്ട്. പോയിന്റ് വെട്ടിക്കുറയ്ക്കൽ നടപടി വീണ്ടും ഏറ്റുവാങ്ങിയതോടെ രണ്ടാം സ്ഥാനത്തു നിന്നിരുന്ന യുവന്റസ് ഇപ്പോൾ യൂറോപ്യൻ യോഗ്യതക്കും താഴേക്കു വീണു പോയതോടെയാണ് ക്ലബിനൊപ്പം തുടരുന്ന കാര്യത്തിൽ ഡി മരിയയുടെ നിലപാടുകൾ മാറിയതെന്നായിരുന്നു റിപ്പോർട്ടുകൾ ഉണ്ടായിരുന്നത്.
മുപ്പത്തിയഞ്ചു വയസായെങ്കിലും ഇപ്പോഴും മികച്ച പ്രകടനമാണ് ഏഞ്ചൽ ഡി മരിയ നടത്തുന്നത്. അർജന്റീനയുടെ കഴിഞ്ഞ മൂന്നു കിരീടനേട്ടങ്ങളിലും പ്രധാനപ്പെട്ട പങ്കു വഹിക്കാൻ താരത്തിന് കഴിഞ്ഞിരുന്നു. പരിക്കിന്റെ പ്രശ്‌നങ്ങൾ ബാധിക്കാതെയിരുന്നാൽ ഏതു ടീമിന് വേണ്ടിയും തന്റെ കഴിവിന്റെ പരമാവധി നൽകാൻ താരത്തിന് കഴിയുമെന്നുറപ്പാണ്. അതുകൊണ്ടു തന്നെ യുവന്റസ് വിട്ടാലും താരത്തിന് യൂറോപ്പിൽ തന്നെ തുടരാനുള്ള അവസരമുണ്ടാകും.
🚨 Borussia Dortmund have contacted Ángel Di María. @fczyz 🇩🇪🟡⚫️ pic.twitter.com/7m4IPYXokh
— All About Argentina 🛎🇦🇷 (@AlbicelesteTalk) May 23, 2023
ഇപ്പോൾ ജർമൻ ക്ലബായ ബൊറൂസിയ ഡോർട്ട്മുണ്ട് ഏഞ്ചൽ ഡി മരിയക്ക് വേണ്ടി ശ്രമം നടത്തിയെന്ന റിപ്പോർട്ടുകൾ പുറത്തു വരുന്നുണ്ട്. സീസണിലെ അവസാനത്തെ മത്സരത്തിൽ വിജയം നേടിയാൽ ജർമൻ ലീഗ് കിരീടം നേടാൻ അവസരമുള്ള ബൊറൂസിയ ഡോർട്ട്മുണ്ട് അടുത്ത സീസണിൽ ചാമ്പ്യൻസ് ലീഗിലും മികച്ച പ്രകടനം നടത്താൻ ഡി മരിയയുടെ പരിചയസമ്പത്ത് ഉപയോഗിക്കാമെന്ന പ്രതീക്ഷയിലാണ്. താരത്തിന്റെ ഏജന്റുമായി ഇവർ ബന്ധപ്പെട്ടിട്ടുണ്ട്.
അതേസമയം ബൊറൂസിയ ഡോർട്ട്മുണ്ടിൽ തനിക്ക് അവസരങ്ങൾ ഉറപ്പാണെങ്കിൽ ഓഫർ സ്വീകരിക്കാൻ താരം മടി കാണിച്ചേക്കില്ല. അടുത്ത വർഷം നടക്കുന്ന കോപ്പ അമേരിക്ക ടൂർണമെന്റിൽ അർജന്റീനക്കായി കളിച്ച് വിരമിക്കണമെന്ന ആഗ്രഹമാണ് ഏഞ്ചൽ ഡി മരിയക്കുള്ളത്. ചാമ്പ്യൻസ് ലീഗ് യോഗ്യതയുള്ള ഒരു ക്ലബിൽ കളിച്ചാൽ കോപ്പ അമേരിക്ക ടീമിൽ ഇടം നേടാനുള്ള സാധ്യത വർധിക്കുമെന്നത് താരം പരിഗണിക്കും.