റയലിന്റെ യുവതാരം മാർക്കോ അസെൻസിയോക്കു വേണ്ടി പ്രീമിയർ ലീഗ് ക്ലബുകൾ ശ്രമം നടത്തുന്നു. താരത്തിന്റെ ഏജന്റാണ് ഇക്കാര്യം വെളിപ്പെടുത്തിയത്‌. 150 ദശലക്ഷം യൂറോയുടെ രണ്ട് ഓഫറുകളാണ് റയൽ ഇപ്പോൾ തന്നെ നിഷേധിച്ചത്. 2023 വരെ റയലുമായി കരാർ ഒപ്പിട്ടിട്ടുള്ള സ്പാനിഷ് താരത്തിന് എഴുനൂറു ദശലക്ഷം യൂറോയാണ് റിലീസിങ്ങ് തുകയായി റയൽ വെച്ചിട്ടുള്ളത്. അതു കൊണ്ട് റയലിന്റെ അനുവാദമില്ലാതെ താരത്തെ ഒരു ക്ലബിനും തൊടാനാവില്ലെന്നത് തീർച്ചയാണ്. 22കാരനായ അസെൻസിയോ മയോർക്കയിൽ നിന്നാണ് റയലിലേക്ക് ചേക്കേറുന്നത്.

റയലിനു വേണ്ടി ഈ സീസണിൽ 32 ലാലിഗ മത്സരങ്ങളിൽ കളിക്കാനിറങ്ങിയെങ്കിലും പത്തൊൻപതു മത്സരങ്ങളിൽ മാത്രമാണ് അസെൻസിയോ ആദ്യ ഇലവനിൽ ഇറങ്ങിയത്. റയലിൽ അവസരങ്ങൾ ഇല്ലാത്തത് താരത്തെ തങ്ങളുടെ കൂടാരത്തിലെത്തിക്കാൻ സഹായകമാവുമെന്നാണ് പ്രീമിയർ ലീഗ് ക്ലബുകളുടെ പ്രതീക്ഷയുണ്ടായിരുന്നത്. എന്നാൽ താരത്തിന്റെ ഏജൻറായ ഹൊറാസിയോ ഗിഗിയോളി അസെൻസിയോക്കു വന്ന രണ്ടു വാഗ്ദാനങ്ങളും റയൽ അപ്പോൾ തന്നെ തള്ളിയെന്ന് വെളിപ്പെടുത്തി. താരത്തിനു വയലിൽ തന്നെ ഒരു മികച്ച ഭാവിയുണ്ടെന്നാണ് ഏജന്റിന്റെയും അഭിപ്രായം.

ഇംഗ്ലണ്ടിൽ നിന്നാണു വൻ തുകയുടെ ഓഫർ വന്നതെന്നതു കൊണ്ടു തന്നെ അവർ താരത്തെ സ്വന്തമാക്കണമെന്ന് അത്രയധികം ആഗ്രഹിക്കുന്നുണ്ടാകുമെന്ന് ഏജന്റ് പറഞ്ഞു. പ്രീമിയർ ലീഗ് ക്ലബുകളെ സംബന്ധിച്ചിടത്തോളം ഇത്രയും തുക നിസാരമാണെന്നും താരത്തിന്റെ ഏജന്റ് പറഞ്ഞു. ഈ പ്രാവശ്യത്തെ ലോകകപ്പിനുള്ള സ്പെയിൻ ടീമിലെ പ്രകടനം താരത്തിന്റെ കരിയറിൽ നിർണായകമാകുമെന്നാണ് കരുതുന്നത്. മഞ്ചസ്റ്റർ സിറ്റിയാണ് താരത്തിനു പുറകേയുള്ള പ്രധാന ഇംഗ്ലീഷ് ക്ലബ്.

അത്ലറ്റികോ മാഡ്രിഡ് താരം അന്റോണിയോ ഗ്രീസ്മാന്റെ ട്രാൻസ്ഫർ അഭ്യൂഹങ്ങൾ ഓരോ ദിവസവും പുതിയ വഴിത്തിരിവിലാണ് ഇപ്പോൾ. താരം ബാഴ്സയിലേക്കു ചേക്കേറുമോ ഇല്ലയോ എന്നു ഉറപ്പു പറയാനാവാത്ത സ്ഥിതിയാണ് ഇപ്പോഴുള്ളത്. അതിനിടയിൽ അത്ലറ്റികോ പുറത്തിറക്കിയ അടുത്ത സീസണിലേക്കുള്ള കിറ്റിന്റെ ചിത്രത്തിൽ നിന്നും ഗ്രീസ്മാനെ ഒഴിവാക്കിയത് ബാഴ്സ ആരാധകർക്ക് പ്രതീക്ഷയുണർത്തിയിട്ടുണ്ട്. മാഴ്സലിക്കെതിരായ ഫൈനലിൽ ഇരട്ട ഗോൾ നേടി യൂറോപ്പ ലീഗ് കിരീടം അത്ലറ്റികോക്ക് നേടിക്കൊടുക്കാൻ നിർണായക പങ്കു വഹിച്ചതോടെ നേരത്തെ താരം മാഡ്രിഡ് ക്ലബിൽ തന്നെ തുടരുമെന്നായിരുന്നു സൂചനകൾ.

SENTIMIENTO SIN RIVAL 🔴⚪🔴 Presentamos nuestra primera equipación para la próxima temporada ➡ https://t.co/0IbuILYBic #AúpaAtleti pic.twitter.com/G7Omqb97lF

— Atlético de Madrid (@Atleti) May 24, 2018

ബാഴ്സയിലേക്കു ചേക്കേറാൻ സമ്മതം മൂളിയ കളിക്കാരനായിരുന്നു ഗ്രീസ്മാൻ. കഴിഞ്ഞ ജനുവരി മുതൽ തന്നെ താരത്തിനു പുറകിൽ സജീവവമായി ബാഴ്സയുണ്ട്. താരവുമായി നിയമാനുസൃതമല്ലാതെ കൂടിക്കാഴ്ച്ചകൾ നടത്തിയതിന് ബാഴ്സക്കെതിരെ അത്ലറ്റികോ ആരാധകർ പരാതി നൽകുകയും ബാഴ്സ മാപ്പു പറയുകയും ചെയ്തിരുന്നു. എന്നാൽ പിന്നീട് ബാഴ്സയുമായുള്ള ട്രാൻസ്ഫർ ബന്ധങ്ങളുടെ പേരിൽ താരത്തെ അത്ലറ്റികോ ആരാധകർ മത്സരങ്ങൾക്കിടെ കൂക്കി വിളിക്കാൻ തുടങ്ങിയതോടെയാണ് താരം ബാഴ്സയിലേക്കു ചേക്കേറാൻ കൂടുതൽ സാധ്യതയേറിയത്.

ലോകകപ്പിനു മുൻപ് താരം ബാഴ്സ ട്രാൻസ്ഫർ പൂർത്തിയാക്കുമെന്ന് പ്രതീക്ഷിച്ചെങ്കിലും യൂറോപ്പ ലീഗ് വിജയം നേടിയതോടെ ഗ്രീസ്മാൻ വീണ്ടും ആശയക്കുഴപ്പത്തിലായിരുന്നു. എന്നാൽ അതിനു ശേഷം നടന്ന ലാലിഗ മത്സരത്തിൽ സ്വന്തം മൈതാനത്തു നിന്നും വീണ്ടും ആരാധകർ താരത്തെ കൂവിയത് ഫ്രഞ്ച് താരത്തിനു സഹിക്കാവുന്നതിലും അപ്പുറമായിരുന്നു. ഇതിനു പുറമേയാണ് ഗ്രീസ്മാനെ ഒഴിവാക്കി അത്ലറ്റികോ പുതിയ കിറ്റ് റിലീസ് ചെയ്തത്. ഇതോടെ താരം അത്ലറ്റികോ വിട്ട് ബാഴ്സയിലേക്ക് ചേക്കേറാനുള്ള വഴികൾ വലുതായിരിക്കയാണെന്നാണ് യൂറോപ്യൻ മാധ്യമങ്ങൾ സൂചിപ്പിക്കുന്നത്.

ബാഴ്സലോണയുടെ ചരിത്രത്തിലെ ഏറ്റവും മികച്ച താരമാണ് മെസിയെന്ന് നിസംശയം പറയാം. ഇത്രയും കാലം ഒരേ ഫോമിൽ കളിച്ച മറ്റൊരു താരം ബാഴ്സലോണയുടെ ചരിത്രത്തിൽ ഉണ്ടായിട്ടില്ല. നാലു ചാമ്പ്യൻസ് ലീഗുൾപ്പെടെ 32 കിരീടങ്ങളാണ് ബാഴ്സക്കൊപ്പം മെസി സ്വന്തമാക്കിയത്. അഞ്ചു ബാലൺ ഡി ഓറും ഇക്കാലയളവിൽ മെസി സ്വന്തമാക്കി. അതു കൊണ്ടു തന്നെ ബാഴ്സലോണയുടെ മൈതാനമായ ക്യാമ്പ് നൂവിൽ മെസിയെ ആദരിച്ച് നിരവധി സെഷനുകൾ തന്നെയുണ്ട്. എന്നാൽ ബാഴ്സയിൽ മാത്രമല്ല, യൂറോപ്പിൽ ബാഴ്സയുടെ പ്രധാന എതിരാളികളായ ജർമൻ വസന്മാരായ ബയേൺ മ്യൂണിക്കിലും മെസിക്ക് സ്വന്തമായി ഒരിടം അവർ ഒരുക്കിയിട്ടുണ്ട്.

Leo Messi es tan grande que tiene una pequeña sección dedicada a él en el Allianz Arena. Se trata de una camiseta firmada. Es el único objeto situado en el Allianz Arena que no está relacionado al Bayern Múnich. Al más grande se le tiene que rendir tributo, mis respetos. pic.twitter.com/TL4IXXxwWy

— Luis Mora (@luismora_22) May 23, 2018

ബയേണിന്റെ സ്റ്റേഡിയത്തിലുള്ള മ്യൂസിയം ക്യാബിനറ്റിലാണ് ബാഴ്സലോണ താരത്തിന്റെ ജേഴ്സി പ്രദർശനത്തിനു വച്ചിരിക്കുന്നത്. ബയേൺ മ്യൂണിക്കിന്റെ മ്യൂസിയത്തിൽ ക്ലബുമായി ബന്ധമില്ലാതെ ആകെയുള്ള ഒരു വസ്തു മെസിയുടെ ഈ ജേഴ്സിയാണ്. എന്നാൽ ക്ലബുമായി ചെറിയൊരു ബന്ധം മെസിയുടെ ജേഴ്സി അവിടെ വരാനുള്ള കാരണത്തിനുണ്ട്. ബയേണിന്റെ ഇതിഹാസ താരമായ യെർദ് മുള്ളറുടെ ഒരു കലണ്ടർ വർഷത്തിൽ ഏറ്റവും കൂടുതൽ ഗോൾ നേട്ടമെന്ന റെക്കോർഡ് മെസി തകർത്തതിന്റെ ബഹുമാന സൂചകമായാണ് മെസിയുടെ ജേഴ്സി ബയേണിന്റെ സ്റ്റേഡിയത്തിൽ പ്രദർശിപ്പിച്ചിരിക്കുന്നത്.

1972ൽ യെർദ് മുളളർ നേടിയ ഒരു വർഷത്തിൽ എൺപത്തിയഞ്ചു ഗോളുകളെന്ന റെക്കോർഡ് 2012ൽ മെസി 91 ഗോളുകൾ നേടി മെസി മറികടന്നിരുന്നു. റെക്കോർഡ് നേട്ടം മറി കടന്നതിനു ശേഷം അന്നു ധരിച്ചിരുന്ന ജേഴ്സി ബയേൺ ഇതിഹാസത്തിന് അയച്ചു കൊടുക്കാൻ മെസി തീരുമാനിക്കുകയായിരുന്നു. മുളളർക്ക് തന്റെ എല്ലാ ആദരവും ഉണ്ടെന്നുള്ള സന്ദേശത്തോടെയാണ് മെസി അന്നണിഞ്ഞ ജേഴ്സി താരത്തിനു നൽകിയത്. ഇതാണ് ബയേണിന്റെ സ്റ്റേഡിയത്തിൽ സൂക്ഷിച്ചിരിക്കുന്നത്.